Nettungen evaluert med blanda resultat

Evalueringa av arbeidet med å setje i verk ein modell for samarbeid kring oppvekstmiljøet til barn og unge blir presentert i eit nytt skrift skriven av NOVA-forskar Cay Gjerustad.

Forsøka med Nettungen
Modellen Nettungen er prøvd ut i fylka Buskerud og Sør-Trøndelag i regi av foreininga Vaksne for barn og NOVA. I forsøka med modellen har det blitt lagt vekt på kor viktig kunnskap og informasjon om einingar som arbeider med barn og unge, er for samarbeidet. Eit av tiltaka er å leggje opplysningar om tilbod til barn og unge ut på internett slik at alle som er interesserte, kan sjå det. 

Evalueringa
I evalueringa søkjer Gjerustad å svare på spørsmålet: Fører innføringa av Nettungen til meir koordinering og samordning av arbeidet med barn og unge? Metodane som blei brukte i evalueringa var ei intervjuundersøking og ei spørjeundersøking som ble gjenteke to gonger.

Resultata er blanda
Evalueringa syner at delar av iverksetjinga av Nettungen var vellukka, medan andre delar ikkje ga resultat.

Iverksetjinga av Nettungenmodellen:

• lukkast med å skaffe seg oversikt over tilboda til barn og unge i kommunane
• lukkast i nokon grad med å betre samarbeidet i den tverrfaglege samarbeidsgruppa
• lukkast ikkje å få til generelt meir samarbeid mellom alle som arbeider med barn og unge i kommunen
  

Spørjeundersøkingane synte at dei som arbeider med barn og unge i kommunane har behov for meir informasjon og oversikt over kva tilbod som eksisterar; Nettungen sitt sterke fokus på informasjonsflyt ser difor ut til gje svar på eit behov.

Behov for oversikt
Mange einingar i kommunane har som målsetting å gje barn og unge best moglege oppvekstvilkår. Skular, barnehagar, fritidsklubbar, barnevern, helseteneste og pp-teneste arbeider alle mot det same overordna målet. Kvar verksemd har fokus på og ansvar for ein avgrensa del av oppveksten til barna. Frivillige organisasjonar som vil gje barna ein god fritid kjem i tillegg. Einingane blir spesialistar på sine område, noko som sikrar effektivitet og kompetanse. Ofte går det likevel ut over heilskapen, det kan vere vanskeleg å ha oversikt over kva som eksisterer av tilbod, og kva den einskilde verksemda arbeider med. Dermed blir koordinering og samarbeid viktig for å kunne gje barna det beste heilskaplege tilbodet. 

Undersøkinga er finansiert av Vaksne for barn.

For meir informasjon, kontakt Cay Gjerustad.

NOVA Skriftserie 2/06
Implementering av Nettungen
Evaluering av et arbeid for å bedre samarbeidet omkring barn og unges psykiske helse
Cay Gjerustad

Les meir om barneforskinga hos NOVA.
Les meir om ungdomsforskinga hos NOVA.